Já, hérna eru einhverjir búnir að vera með hor, hósta og augnsýkingu og sumir eru það ennþá.
Ísak Máni tók þá ákvörðun að vera heima í dag, eins og í gær og ná þessu almennilega úr sér, ætlar sér ekki að verða lasinn aftur.
Daði Steinn er ósköp tuskulegur ennþá, en held að þetta sé að skríða saman hjá honum, er með ljótan hósta og augnsýkingu.
Logi Snær er hins vegar nokkuð góður og stundar sinn leikskóla að fullu, enda bara tvær fjarstýringar á Play station tölvunni og þá geta bara tveir verið heima í einu


Það er nú ekki leiðinlegt að fá að vera með stóra brósa í tölvunni. En takið eftir þessum forláta hummel buxum sem barnið er í - hann verður nú að eiga ÍR buxur líka(þó þetta séu nú bara ermar af gamalli ÍR peysu)

Daði Steinn er líka voða duglegur að taka til í eldhúsinu eins og sjá má á næstu mynd.


En það er nú líka gott að hafa eina svona skúffu sem það má róta í í eldhúsinu.

Jæja ætli sé ekki best að halda áfram að leita að dagmömmu fyrir drenginn - búin að finna tvær hér í bökkunum sem eru með laust pláss, en af einhverjum ástæðum vilja þær ekki fá Daða Stein í tvo mánuði - spurningin er núna sú hvort maður eigi að halda áfram að vera heiðarlegur og segja að mann vanti bara pláss í tvo mánuði, eða sækja bara um pláss og segja því svo upp eftir að hann er búinn að vera mánuð, ef það er það sem þarf til að fá plássið

Já hann Daði Steinn er orðinn 10 mánaða - mikið líður nú tíminn hratt
Nú hann er farinn að standa sjálfur eins og ekkert sé, og meira að segja farinn að standa upp sjálfur úti á miðju gólfi án þess að styðja sig við neitt. Í tilefni dagsins fylgja hér þrjár myndir sem voru teknar áðan.






Það gekk smá brösuglega að ná mynd af honum standa sjálfum, því þegar myndavélin er í augsýn þá er hann fljótur að koma til mín.

Af hinum er bara allt fínt að frétta, heilrifan á eyranu á Loga Snæ grær hratt og örugglega saman og Ísak Máni er bara á fullu í öllu sínu prógrammi, og svo á hann það nú til að bæta nokkrum dýfum, magaæfingum og armbeygjum við hérna á stofugólfinu. Já þeir eru flottir þessir gullmolar mínir.
Daði Steinn er kominn með dagmömmupláss í haust, en hún Heiða, sem passaði Loga á sínum tíma ætlar að taka hann. Hins vegar á ég eftir að finna út hvernig ég tækla vormánuðina Er búin að bjóða Ingu vinnu, en held að hún ætli að afþakka það, enda ekki há laun í boði hjá mér, he, he, 25 þús á mán. sem Reykjavíkurborg leggur til á meðan hann er ekki kominn til dagmömmu eða á leikskóla.
Nóg af bulli í bili.....ætla að fara að setja mig í stellingar fyrir leikinn

ÁFRAM ÍSLAND!!!!!!!!

Jæja, þá er best að henda niður nokkrum línum af okkur hérna. Maður er nú ekki allt of duglegur að blogga þessa dagana.
Allt er komið í rútínu aftur eftir sukk jólafrísins, sem þýðir jú að maður er kominn í skutlið á fullu aftur - en það er líka bara gott að fá rútínuna sína aftur með tilheyrandi prógarammi.
Ég er eitthvað að rembast við að fylgja einhverju heilsuátaki í vinnunni hjá Davíð og gengur svona alveg þokkalega, þó það sé frekar erfitt að taka 400 metrana hérna og gera 25 magaæfingar á milli. Geri þetta þá bara á minn hátt - fer út að labba eða skokka og geri svo æfningarnar. Maður hefur víst ansi gott af þessu.
Ætla svo að henda nokkrum myndum af Daða Steini hérna inn í lokin - og tvær af Davíð, en Logi Snær er stundum með myndavélina á lofti hérna og nær þá oft fínustu myndum sem fá að fljóta með. Eldri bræðurnir hérna eru ekki of mikið fyrir að láta mynda sig þannig að það er því miður engin mynd af þeim.
Þessi er af Daða Steini síðan 7. jan. en hann er farinn að standa alveg sjálfur


Hérna er hann að labba eins og björn - ótrúlega krúttlegt.


Svo koma hérna nokkrar myndir með allskonar andlitssvipum.










Veit svosem ekki hvað kallinn segir við þessu myndabloggi, en Logi Snær á heiðurinn af myndunum af honum Spurning hvaðan barnið hefur það að vera svona furðulegur á svipinn, he, he.

Læt þetta duga í bili....

Árið 2009 liðið og 2010 hefur heilsað. Við vorum í Æsufellinu í gærkvöld í dýrindis kvöldverð. Við Daði Steinn skröngluðumst heim um 10, en þar sem Daði er lasinn þá var tekin sú ákvörðun að best væri að koma honum beint í sitt bæli. Ég horfði því á áramótaskaupið hér heima og svo á flugeldana - svona framan af allavega, svo var loftið orðið svo mengað að ekki sást nú mikið, en Daði Steinn svaf af sér allan hávaðann. Hinir kallarnir mínir komu svo ansi þreyttir heim að verða eitt í nótt. Daða fannst svo engin hemja að vera að hanga í bælinu í morgun svo við tvö skriðum á fætur um hálf átta

Árið 2009 er okkur að sjálfsögðu mjög eftirminnilegt, en þar ber helst að nefna fæðingu Daða Steins. En eins og gefur að skilja snerist árið að mestu um börnin mín og uppeldi þeirra. Ég skrapp nokkrum sinnum með þá í Baulumýri og svo fórum við einhverjar ferðir í Grundó líka. Ég lét Davíð að mestu um keppnisferðir Ísaks Mána, en þó skelltum við okkur öll fjölskyldan á Akureyri í nóvember til að fylgjast með honum keppa í körfubolta. Davíð lauk diplóma námi í markaðsfræði frá HR í desember með miklum glans. Ísak Máni stundar körfubolta og fótbolta af kappi og æfir einnig á píanó í tónskóla Eddu Borg. Logi Snær er í íþróttaskóla og stundar ýmsar fimleikaæfingar í hjónarúminu og sófanum þess á milli, en hann er óttalegur íþróttaálfur. Daði Steinn stundar skirðæfingar og uppréttur þessa dagana og finnst æði ef hann nær að ýta á undan sér þeim hlutum sem hann stendur upp við. Ég reyni svo eftir fremsta megni að styðja og hvetja alla flottu strákana mína í því sem þeir taka sér fyrir hendur. Ég eignaðist einnig tvö systkinabörn, en Inga og Gunni eignuðust hana Heklu Björk og Haraldur og Kristín eignuðust hann Hersi Jón.

Niðurstaðan sú að 2009 var gæfuríkt og gott ár fyrir okkur og ég horfi björtum augum á árið 2010.

Gleðilegt ár kæru vinir!

Þá er maður búinn að vígja hrærivélina og tókst það bara með ágætum, ótrúlega þægilegt að skella bara öllu í skál og láta hræra fyrir sig.
Fyrst voru bakaðar skonsur sem runnu ljúflega niður í hungraða maga í hádeginu, með grjónagrautnum. Svo skellti ég í eina eplaköku sem rann líka ljúflega niður með heitu kakói í kaffinu, en það er búið að vera eitthvað af auka gemlingum hérna í dag sem hefur þurft að metta. Rúnar Atli og Logi Snær voru orðnir leiðir á að bíða eftir að ég gæti hjálpað þeim að skera kökuna svo þeir tóku bara til sinna ráða og skáru sér bara sneið þar sem var næst þeim, svo fallega kakan mín leit svona út í lokin.



Hérna eru svo hungruðu úlfarnir að gúffa í sig í kaffitímanum.
Ísak Máni, Logi Snær, Rúnar Atli og Eldar Máni.

Allir auðvitað orðnir svangir eftir hamaganginn í snjónum.

Daði Steinn svaf svo bara á meðan á öllum atganginum stóð.

Læt þetta duga í bili.

Gleðileg jól kæru vinir, ættingjar og aðrir blogglesendur! Vonandi rann jólasteikin ljúflega niður hjá ykkur eins og hjá okkur.

Daði Steinn er 9 mánaða í dag, ótrúlegt hvað tíminn líður hratt
Hann finnur sér alltaf eitthvað til dundurs þessi elska, en einn daginn sat ég við tölvuna í mínum venjulega tölvurúnti og Daði var að leika sér undir borði og hjá glugganum, svo er hann orðinn eitthvað voðalega pirraður, svo ég fer að athuga hvað sé með hann og þá er hann kominn upp á grindina sem er undir barnavagninum og situr fastur þar:











Stundum var þetta fyndið en stundum grét maður bara yfir þessu, vissi ekki alveg hvernig hann átti að tækla þetta

Aðfangadagur gekk vel fyrir sig á þessu heimili. Ég dró alla hersinguna út í göngutúr eftir hádegi til að skila af okkur síðustu pökkunum, fórum í Engjaselið og Æsufellið. Þegar heim var komið var hafist handa við að undirbúa matinn, en strákarnir horfðu á dvd og voru bara þokkalega rólegir. Þegar allt var svo að verða klárt var spennustigið orðið nokkuð hátt hjá sumum, en allt gekk þó vel fyrir sig og var borðað í rólegheitum og gengið frá áður en sest var hjá pökkunum.
Allt var þetta gert eftir kúnstarinnar reglu og skiptust Ísak Máni og Logi Snær á að ná í pakka og svo var beðið á meðan hann var opnaður. Hérna er Ísak Máni að opna einn af pökkunum sínum, en það var ýmislegt gert til að villa um fyrir mönnum:


Stundum varð þó smá ágreiningur um hvernig ætti að gera hlutina og þá fannst þeim elsta hann þurfa að kenna þeim yngri:


Allt gekk þetta þó vel að lokum og allir mjög glaðir með sitt. Ein góð bræðramynd náðist áður en pakkarnir voru teknir upp:


Hérna koma svo tvær myndir af 9 mánaða gaurnum mínum, sem er ósköp góður og duglegur að dunda sér sjálfur:




Talandi um hvað tíminn líður hratt, þá sefur elsti drengurinn ennþá þegar þetta er skrifað klukkan 10:37, en þeir feðgar fóru víst frekar seint að sofa í gær, eða um hálf eitt þegar þeir höfðu horft á svona eins og einn NBA leik í sjónvarpinu.

Vini hans sem hringdi hérna á slaginu 10 fannst þetta frekar skrítið.

Orðinn langur myndapistill í þetta sinn, en vonandi hafið þið gaman af.
Við þökkum kærlega fyrir gjafirnar sem við fengum og vonum að þeir sem fengu gjafir frá okkur geti nýtt sér þær.
jólakveðja úr Eyjabakkanum.

Nú styttist óðum í jólin og sveinarnir farnir að koma einn af öðrum við mikla gleði ungviðisins. Við höfum verið að reyna að jólast aðeins það sem af er desember.
Ég er búin að fara með strákana í Smáralindina þar sem þeir horfðu á jólaleikrit í vetrargarðinum og smökkuðu mismunandi tegundir af jólakjöti, en það vildi svo til að þegar að við fórum voru kjötiðnaðarmenn að kynna kjöt í vetrargarðinum

Ég tók mig svo til og bakaði piparkökur með drengjunum og svo er búið að vera að skreyta þær af og til síðan
Hérna er Logi Snær mjög alvörugefinn við baksturinn:


Og hérna kemur Ísak Máni, aðeins afslappaðri enda með meiri reynslu:


Hérna koma svo listrænu hæfileikarnir þeirra í ljós:


Annars líður desember bara í rólegheitum hjá okkur. Gott að vera búin að endurheimta kallinn úr skólanum og geta gert eitthvað saman aftur. Annars var helgin ansi þétt setin hjá okkur. Það byrjaði á tónleikum hjá Ísaki Mána kl 10 á laugardaginn, Jólaball í vinnunni hjá Davíð kl 14 og útskriftarveisla hjá Tinnu Rut kl 16 og svo bara heim og lagst í leti. Sunnudagsmorguninn fór svo í fótboltamót í Egilshöllinni þar sem Ísak Máni var að keppa, en hann var að sjálfsögðu eins og klettur í vörninni. Ég skellti mér svo í Smáralindina til að redda hinu og þessu, svona til að hafa eitthvað að gera
Daði Steinn kippir sér ekki mikið upp við allt þetta prógram, enda vanur að þvælast um með mömmu sinni við að skutla fram og til baka.

þangað til næst......verið góð við hvort annað.

Daði Steinn varð 8 mánaða 26. nóvember, en þá varð Guðrún systir líka 38 ára - til hamingju með það.
Daði Steinn nánast hleypur á fjórum fótum og er aðeins að byrja að fikra sig áfram standandi meðfram hlutum. Hann kann núna að fara sjálfur niður ef hann stendur upp og engin stóráföll orðið hjá honum í þessu brasi sínu.





Daði Steinn er yfirleitt mjög duglegur að hjálpa mér í heimilsstörfunum og þar er herbergið hans Ísaks Mána engin undantekning í tiltektinni:



Það sem við höfum verið að bralla undanfarið er að við skruppum öll fjölskyldan til Akureyrar til að fylgja Ísaki Mána eftir á körfuboltamót um þarsíðustu helgi. Fengum gistingu hjá Jóhönnu og frítt fæði - takk fyrir okkur
Eftir það hefur magapest verið að hrjá eitthvað af fjölskyldumeðlimunum, ýmist uppgangur, niðurgangur eða bara magaverkur. Eins hefur Daði Steinn verið stíflaður af kvefi. Ég hef einnig verið að dunda mér við að sauma jóladagatal fyrir Ísak Mána, en hann gerði mér það ljóst að hann vildi ekki súkkulaði dagatal þetta árið. Eftir að hafa skoðað á netinu og í Jólahúsinu á Hrafnagili og hugsað mikið lét ég loks verða af því að fara að framkvæma eitthvað, heljar vinna en gaman að sjá útkomuna, þó ég eigi eftir að fínisera smá.  Þetta hafðist fyrir 1. des. en vinnan stóð til hálf tólf í gærkvöldi. Hérna er útkoman eins og hún er núna:


Ein í lokin af öllum þremur strákunum mínum:


Njótið aðventunnar......

mamma mín er 60 ára í dag. Hún hélt okkur veislu af því tilefni í gær, hún lumaði þó á leyndarmáli sem hún opinberaði í gær, já henni er margt til lista lagt henni elsku mömmu. Í stað þess að halda risa afmælisveislu ákvað hún að gera eitthvað fyrir sjálfa sig og gaf út sína fyrstu ljóðabók sem hún hefur verið að vinna að síðustu ár - aldeilis frábært framtak hjá henni. Til hamingju með þetta allt saman mamma - ég er ótrúlega stolt af þér

líf og fjör hjá okkur í Eyjabakkanum, enda strákagengi hérna með tilheyrandi fjöri.

Hjónarúmið verður oft fyrir valinu þegar drengirnir vilja hnoðast og gera hinar ýmsu æfingar.

og kallinn lendir oftar en ekki undir þessu öllu

Stundum verða menn líka bara dauð þreyttir á öllu saman:

á meðan aðrir halda áfram að leika sér:


Daði Steinn er kominn á fullt, ferðast nú bara um á fjórum fótum og reynir að standa upp hvar sem hann finnur eitthvað til að toga sig upp með, þetta gerir það að verkum að húsmóðirin má ekki líta af kauða í augnablik þessa dagana. En hann verður væntanlega fljótur að styrkjast og verður farinn að labba áður en langt um líður.

Hann fékk hins vegar nóg af letinni í móðurinni og ákvað að taka málin í sínar hendur hvað varðar baðferðir:

Hmmm, það er stundum vatn hérna inni.


Ætli mér sé óhætt??


Ég lét vaða, en ég misskildi þetta eitthvað, ég kom ekkert hreinni út

Fórum í Grundarfjörð um helgina og fengum æðislegt veður til útiveru á laugardeginum. Næstu helgi er svo fótboltamót hjá Ísaki Mána í Keflavík og sextugs afmæli hjá mömmu. Helgina þar á eftir er svo körfuboltamót hjá Ísaki Mána. Logi Snær er flottur í íþróttaskólanum og byrjar í næstu viku líka í sjúkraþjálfun hjá Rúnari sjúkraþjálfaranum hans Ísaks Mána, en hann er með of stuttar sinar og of háa rist. Spurning um að fara að byrja að teygja á Daða Steini til að koma í veg fyrir þetta hjá honum. Ég reyni svo til að rækta mig, að fara í göngutúra á morgnanna með Daða Stein í vagninum. Davíð ræktar hins vegar bara heilasellurnar í HR þessa dagana.

Já, það er alltaf fjör í Eyjabakkanum.

Jæja, smá update af okkur hérna.
Ísak Máni var að keppa í körfubolta um síðustu helgi og gekk alveg ljómandi, vann tvo leiki og tapaði tveimur. Hérna er hann tilbúinn í slaginn og búinn að fá lánaða ÍR treyju af Jökli. Lebron James þeirra ÍR-inga.



Eins og kom fram í síðasta bloggi þá fékk Logi Snær peysuna langþráðu og er meira að segja að nota hana þessa dagana. Smellpassar, en ekki hvað.



Hann er einnig á fullu í íþróttaskólanum, þar sem hann hreinlega blómstrar. Móðirin tók myndavélina með í síðasta tíma og náði að smella einni af þar sem hann var að sveifla sér í köðlunum, það var engu líkara en að Tarzan sjálfur væri mættur á svæðið. Hann er þessi sem er að sveifla sér.



Daði Steinn hefur haldið sig heima þessa vikuna, enda búinn að vera stíflaður úr kvefi. Hann er mikið að æfa sig að fara upp á fjórar fætur, en er ekki enn kominn með jafnvægið til að geta skriðið þannig. Er þó farinn að fara mjög hratt yfir á maga skriðinu. Hérna er hann kominn á fjórar. Og þarna sést vel þessi eina tönn sem er komin.



Hérna kemur svo önnur af honum, eitthvað skrýtinn á svipinn



Það er nóg að gera hjá Davíð í skólanum og húsfélagsvinnunni þessa dagana, hann sést því ekki mikið hérna suma dagana, en það ætti að skána þegar skólinn klárast hjá honum í byrjun desember. Ég sjálf hef svosem nóg að gera í húsverkum, það liggur við að það fari allt í óefni í þvottahúsinu ef maður sleppir því að þvo þvott einn dag. Og þar sem það eru framkvæmdir sem fela í sér mikinn sand hérna fyrir utan þá þarf maður að ryksuga að lágmarki einu sinni á dag svo Daði Steinn geti verið óáreittur á gólfinu. Það jákvæða við þetta allt er að maður er þá ekki að trassa það að gera hlutina

Ísak Máni er í vetrarfríi þessa dagana, en hann var samt farinn út fyrir 10 í morgun til að leika við vinina, sem er bara mjög gott.

læt þetta duga í bili..........

jebbs, ég var að klára eina flík og er þvílíkt stolt ofurprjónakona
Það tók ekki nema svona eitt ár að prjóna hana Það hófst allt með því að ég var að fara að prjóna sokka til að gefa í jólagjafir í fyrra, þá sá Logi Snær þessa líka flottu fótboltapeysu í einu prjónablaði hjá mér og var ekki rólegur fyrr en ég sagði að ég myndi prjóna svona peysu handa honum. Það hafðist að lokum - á bara eftir að þvo hana

Hérna kemur svo meistaraverkið (þess má geta að þetta er fyrsta peysan sem ég prjóna):



Svo er bara spurning hvort að drengurinn vilji nota hana á meðan hún passar enn á hann.

Annars allt gott af okkur, einhver svín þó verið á ferðinni hérna - en ekkert hættulegt. Körfuboltahelgi framundan hjá Ísaki Mána - mót í Njarðvík á morgun og hinn.
Læt þetta duga í bili - munið að vera góð hvort við annað

Jæja Jóhanna, hérna kemur hópmyndin af drengjunum mínum:



Allir komnir í sparifötin til að vera viðstaddir skírnina hjá nýjasta Haraldssyninum, sem er nú ekki bara Haraldsson lengur heldur Hersir Jón Haraldsson.

Af okkur er það annars að frétta að Daði Steinn er kominn með fyrstu tönnina sína, en það fór að glamra í henni í fyrradag, en þann sama dag missti Logi Snær einnig tönn númer tvö. Ísak Máni er hins vegar búinn að vera heima í heila viku lasinn, ætli sé ekki líklegt að hann hafi verið með svínaflensuna þar sem þessu fylgdi mikill höfuðverkur og hiti, hann vonar það allavega svo hann sé búinn að fá hana.
Ekkert er lengur öruggt fyrir honum Daða Steini því hann er farinn að fara æði hratt yfir með skæruliðaskriðinu sínu þannig að það er eins gott fyrir suma að halda dótinu sínu í hæfilegri fjarlægð því dótið sem hann stóri bró á er jú ógó spennó
Við skelltum okkur jú í réttir fyrir hálfum mánuði, en það var nú algjört skítaveður svo það var nú ekki mikið verið úti með drengina. Ég fékk hins vegar að hlaupa svoldið á eftir kindum á milli mjalta - Jóhanna þú trúir því ekki hvað það er hressandi að elta rollurassa upp um fjöll og dali

Annars flýgur tíminn bara áfram án þess að maður fái neitt við neitt ráðið, en svona er víst lífið..... njótið þess á meðan tími gefst til
læt þetta duga í bili....

Já af okkur er bara allt hið besta að frétta, gerist svosem ekki mikið utan við þessa hefðbundnu rútínu, enda kanski sést það á blogginu sem hefur verið lítið undanfarið. Ísak Máni var að keppa í fótbolta um helgina, einn sigur og eitt tap, allir þokkalega sáttir. Annars er hann "bara" í fótbolta, körfubolta, píanó og sjúkraþjálfun í hverri viku svo það er nóg hjá okkur Daða Steini að gera í skutlinu. Logi Snær stundar sinn leikskóla af kappi og ætlar á morgun að skreppa á Álftanes og sækja vin sinn í leikskóla þar, það verður bara gaman. Hann er svo einu sinni í viku í íþróttaskólanum og gengur vonum framar.
Davíð stundar fótboltann áfram og svo styttist í skólann hjá honum. Ég hins vegar reyni að hafa við að baka og elda ofan í liðið og tekst það með ágætum, þó ég fái nú stundum skot frá Ísaki Mána um að ég hafi nú nógan tíma til að gera hitt og þetta þar sem ég er nú bara heima. En ég reyni nú að fá mér góða göngutúra nokkrum sinnum í viku þegar Daði Steinn þarf að sofa á morgnanna.
Daði Steinn stækkar og stækkar og er farinn að hreyfa sig á fullu, fer það sem hann ætlar sér og notar til þess þær aðferðir sem honum eru tamar miðað við aldur, þ.e. rúllar sér og ýtir sér með höndunum. Hérna koma nokkrar myndir af honum....hann er athafnamaður mikill




Kominn inn í herbergið hans Loga Snæs - þar er nóg af spennandi hlutum.


Ánægður með sig - hálfur undir sófanum.


Maður verður nú að fá eitthvað að lesa í eldhúsinu.

Hva er ekkert nothæft í þessum poka

Réttir framundan um næstu helgi og þangað stefnum við að sjálfsögðu þó maður smali kanski ekki mikið í þetta sinn
þangað til næst....